(( فتافيت الوجع )) للشاعر ~~~~~ عصام الدين صقر
فتافيت الوجع ...
من بعد نقطة واول سطر ....
يجى افتراق الطرق محتوم
وذات القصيدة ف جملة وشطر
على جبين القدر مكتوب
تحاوطينى تدفينى بطرف التوب
تلاغينى بخلخالك وحسن دلالك
براح الكون مرسوم على شالك
داخل كيان الواقع عايش ف وجدانك
وحضن الدفا جوة التلج صهللة
ولحاف الخوف عدم ولا يدفى
من بعد نقطة واول سطر ...
شمس المغارب بتطرد ضيها
وعشق المعانى نسر طاير ف السما
والعين سهارى بتحرس ارضها
مهما الوجع يشرخ ثنايا الروح
ييجى انبعاث القلم بعد الممات
يكفكف دموع السوسنة بالبوح
والصبر عزم وارادة وحبة ثبات
يفضل شعاع الامل طارح عبير
من بعد نقطة واول سطر ..
تيجى الفصول لاربعة سرسبة
تداعب تطابق الاحلام بدلال
ونبض القلم بالالم مرسال
بين القلوب والعشق موال
ع السمسمية وشط القنال
بواقى الامانى بالفجر شقشقة
شروق الشمس ف خدودك زقزقة
شاعر ومصلوب والحرف مطرقة
مجدولة افكاره والحبل مشنقة
من بعد نقطة واول سطر ....
جيوش الحروف ما تعرف خوف
وعرض البتول بالطهر ملفوف
وطير العهر طاير بريش منتوف
فوق شواطىء عفن بالكدب بيحلق
يكتب اغانى الصدا على ورق ازرق
داخل حديقة وهن غبا النفوس يبرق
من بعد نقطة واول سطر .....
اه يا زمن من ده الزمن
الصدق ليه ملهوش تمن
ولا البشر مش مؤتمن
ع الغدر ناوية مقدما،،، !!
بقلمى عصام الدين صقر
الصورة بعدسة : احمد عصام الدين صقر
ليست هناك تعليقات