تقريبا
تقريبا انا كنت رخيص
مذنب محتاج التخليص
تقريبا انا لازم امشي
واقفل ع القلب بترابيس
انا فاهم انا لازم ابطل
الطيب بقى زي الاهطل
ومشاعري لازم تتعطل
او تسكن جوه البراويز
انا عارف انا لازم افوق
واكسر جوايا الشوق
واهرب بشياكة وبزووء
العب طاولة مع العواجيز
تقريبا انا هبقى بعيد
وهحاول احل التعقيد
هطلع من قلبي حديد
و هاعمل للحنية افيز
انا شايف انا لازم انام
فرحان مستني الاعدام
مش ممكن احب الايام
ولا احس بطعم للزيز
م الاخر صعب التصليح
الاسهل لعب المراجيح
فوق مدبوح تحت جريح
من كل قريب وعزيز
و تقريبا انا ماشي خلاص
وانا جسمي متعبي رصاص
اما ارجع قاسي و قناص
اضرب شمعات الفوانيس
متعافي من ضعف مشاعري
متميز احساسي وشعري
متدلل ومعلي في سعري
ومعادي اثنين وخميس
او هفضل في البعد سنين
اكتب وادفن شعر حزين
وافتكر الناس الحلوين
واقفل صفحات الفيس
ليست هناك تعليقات
إرسال تعليق