قطر الرحلات *-* بقلم الشاعر / عبد الله الهوارى

صفر قطر الرحلات

واولها ف اخرها الرحلة

هى المشايل هى الحاجات

اياها سكة العتمة الكحلة

هى هى المسافات

فى طريق الموت والسحلة

كان لزمتها ايه الهتافات

فى وسط دايرة المحنة

احنا اتعودنا السكات

ودقيقنا على قد الطحنة

طب ليه بتعشمينا بالحلق

الودن مسدود كان احلى

احنا واخدين ع القلق

قلبنا داقه واستحلى

بتفتحيلنا ليه الاحضان

والطريق لقلبك مسدود

ليه بتفتحى البيبان

وباب ودك موصود

بتفرشى ليه الورود

واحنا اتعودنا ع الوحلة

طب ليه بتغيرى الحدود

وفى حدود ودك ارتحنا

بتلف خطوتنا فى دوران

لففتنا شوارع سد

رجعتنا نفس المكان

تايهين بندور ع الحد

كلامنا سكوت وسكوتنا كلام

لا طلنا عنب اليمن

ولا دقنا بلح الشام

الشاعر عبد الله الهوارى قنا قوص جرا جوس

أعجبني