قصيدة رثاء الشاعر الفقيد الغالى أستاذ أحمد أبو شرخ----الشاعر ابو عمار المصري
كــلــمـــــــــة و داع
خلص الحداد
ومسكت من تانى القلم
أكتب وأرسم ع الورق
أنعى وأبكى م الألم
ع اللى اتسحل واللى اتظلم
واللى اتحرق
يا قلمى .
إكتب بالدموع
دة الحرقة والنار
فى الضلوع
مش راضى يطاوعنى القلم
رجّــعنى تانى لضحكته
وأخدنى عنده ف سكته
أكتب ..آهات
وابكى على اليوم
اللى فات
سجادته لساها دفيانة بآخر
صلاة
والحبر لساه ع الورق
يرسم فى مانشيتات
لساه بصوته الحى يحكى
أوجاع الوطن
لساه بينعى اللى اندفن
لسة الخطاوى ع الطريق
لسة الإدين ممدودة
بتنجى الغريق
لسّاه بنَفَسه الهادى
بيطفّــى الحريق
يا عقلى يا مجنون افهم بقى
الدنيا رحلة بتنتهى
صاحبك خلاص
لملم آياته فى الكفن
قَـفَـل القلم لّــم الورق
وكتب بأعماله الشهادة ع الجبين
واختار مكانه للسكن
راح فى المعاد اللى انكتب
بصّــيت لصورته جوة قلبى بتبتسم
وبصوت ملايكة يقولى
إمسك فى القلم
إيه انكتب ...؟
وضحكت وف عينى الدموع
وف قلبى أوجاع الوجع
يا صاحبى
يا اعزّ الصحاب
اللى انكتب
كلمة وداع
كلمة وداع
ليست هناك تعليقات