الشاعربهاءالدين بدوي\\\ عنـــــود .. ~*~*~*~
ماأقدرش أقول لك
إني باأحبك
ولا حأقول لك
أنا قلبي ملكك
وإن غبت عني
مش راح أحايلك
يعني ظالمني
وكمان أصالحك
إياك تفكر
إني حاأقولك
وحياة عيونك
تاخدني عندك
دا كان زمان
أيام ماكان
فيه قلب عندك
دلوقلتي لأه
وألف لأه
وكمان حاعاندك
أصلك ناسيني
ومش فاكرني
ودمع عيني
في يوم ماهمك
طول عمري صابر
عليك وشاري
وكنت أحبك
وأداري ناري
وإنت تجافيني
وأتمنى قربك
وحتى قربك
يزيد مراري
وتزيد في صدك
وكأني عبدك
وعايزني أقول لك
إني باأحبك
آه ياني منك
ومن عمايلك
الحب عمره
ماكان ملاوعة
وخد وهات
وازاي وليه
الحب عندي
قلوب مطاوعة
وكل واحد
يشوف حبيبه
بيحب ايه
ويخاف عليه
ومن عينيه
من غير كلام
يفهم أوام
كل الكلام
اللي ف عينيه
وقلبه يسمع
بيقوله ايه
وان شاف حبيبه
بيغير عليه
أو حب يعرف
غلاوته ايه
يكون عتابه
ببسمة حلوه ..
بكلمة حلوة
مش بالملامة
ولا بالأسية
إن شفت دية
وأكتر شوية
وقلب حسك
انك معايا
ومش عليّه
ساعتها حاأرجع
أقول بحبك
وحتلاقيني
أنا كلي ملكك
ويكون مكانك
جوة في عينيه
وأغلى عندي
من الدنيا دية
ليست هناك تعليقات