بقلم طارق شعبان أبو النجا عنوان القصيدة استشهاد محمد الذرة

والليالى العشر
والليالى العشر
وشهر رمضان ابو الكرم والبشر
وجمعتنا سوا
نأذأذ فى الكلام ونرمى القشر
شوف كاااام سنه مرت
علينا وكاااام رمضان !
قاعدين زى م احنا هنا
بنشرب شاى وراه"دخان"
ومسحراتى يفوت
بطبله و ب نبوت
يصحينا ....
وبرضه نيااااام
عقولنا صبحت خشب
والحرب بينا نشب
و ع العدو نعااااام
صايمين ؟؟؟
نعم صايمين

حتى عن حقوق المسلمين
حتى عن " قبلة محمد "
لما داسها " العم سام "
صايمين ....
ولما نفطر نتوووه
نشرب قهاوى و حشيش
م اللى الحكومه جابوو
ينسونا وليد مات فى حضن أبوه
ونسكر كلنا فى
صحة الإعلام !!!
وهو أيه رمضان بدون إعلام !!
مسلسلات...على فوازير
على أفلام
والكل... يصبح تايه
والدوله تبقى تماااااام
وكام ماتشات من الكوره
وطوبه آل " حمرا" من المقصوره
وتبقى دى ثورتنا على الحكام !
!!!!!!!
بالذمه ده اسمه كلام ؟
بقينا كومة لحم مرميه
والرقبه فوق الصدر متنيه
وبيقولوا " عراقه " !!
ويسقونا حماقه
ياخلق هووووووووه اختشوا
دوروا ف امجادكم كده وفتشوا
ح تلاقوا اللى رفع راسكم
هم " متحدى الإعاقه " !!
***
يا " ضريح رخام "
مكتوب عليه "قمة"
لا " جامعه " نافعه ولا "قمه "
الكتف جنب الكتف
و" الشال " مع " العمه "
هو اللى يكره اخوه
ح يبقى له ذمه ؟؟
****
فتحت بابى أنا
لقيت دم الضحايا
واصل لغاية الاعتاب
جريت على الشباك هنا
لقيت حجارة الولاد خلصت
ما فضلش غير حبة تراب
صرخت بعلو صوتى
خدوووووا بيتى
كسروا " العمدان"
اعملوها " حراب "
كسروا الجدران
خدوا طوبها
ملوش لازمه
م احنا عايشين فى الخراب
هو اللى عرضه اندبح
هو اللى عاره اتفضح



ح يدارى فى " ضلفة باب " ؟
*****
وبكره يجى العيد
و ح نعيد
ومسحراتى يفوت
معاه وليد
نديله " كحك وبسكوت "
من الجيد
وندى الواد فلوس
ونسأله بالمره
اسمك ايه ياشاطر ؟
يقول : " محمد الدره " !!