زِعل الكلام منى ، بقلم / ابو عمار المصري

بـَــــــــــــــــــــــح

زِعل الكلام منى

وحروفه مايلة ..على سطورى

أمسك فى الحرف الاقيه يهرب

زى المية

من بين صوابعى بتتسرسب

يا حروفى ..وكنتى مطاوعانى

أراضيكى ازاى ؟

فين أراضيكى ؟

كنتى تفكى

قبضة عتمة ليلى ف ثانية

وتصحى جفون الأمل النعسانة

تلف الدنيا

تملى بحور أيامى بالصبر

وف أحزانى ..ترسمى ضحكة على كراسى

أنسى المر

إيه يا حروف كلماتى الضايعة

فين الاقيكى ؟

ضاع وياكى حلمى وإحساسى

كنتى بتخرجى من جوف جوفى

أحلى مشاعر

كنت بقول وياكى انا شاعر

تهتى ما بين أحلام وشفايف

قلمى وكان ولا سيف بتار

حاسس كدة سنه بينهار

أصبح خايف

جوفه اتيبس

عود متحطب ...حبره الناشف

تايه ع الأسطر بيدور

فين راح يكتب ؟

وأتارى الأسطر مشغولة

والأقواس كلها مقفولة

على أحزان وآلام ومواجع

ما فى مكان

كان ياما كان

كل الصفحات كانت بيضا

وحروفى بتتسابق تجرى

قلمى يقطع ف اللى يهينك

واللى يمسك

يقصفوا سنه

ويقول راجع

يشنقوا حلمه

برضك راجع

إيه دلوقتى يا قلمى حتكتب ؟

خد بنصيحتى ..وحط نهاية.ف آخر سطر

الصفحة السودا

مش ...بحروف

مش ...بكلام

سودا م الخوف والأوهام

والتشكيك ..والتحريض

إكتب كلمة بخط عريض

فضى الحبر الباقى عليها

فضى مواجع قلبى عليها

لم حروف الخوف والذل

واكتب بيها

بس خلاص

خلصت ..بح

خلصت .......بح