تعالى ، بقلم / عبدالهادى الشعراوى‏

تعالى ياضحكة ما تخافى تراب الارض ليك وافى

دا كله والله شوق ليك ماهو انت دوانا الشافى

ياضحكة مغربة عنى

لحد امته هتغيبى

تعالى قربى منى

حرام عليك تعذبى

اقرب ليه وانا شايفه

عيونك ع الوطن خايفه

سامحنى انا مش قادرة

اقولك ايه مانش عارفه

تعالى يمكن الفرحة

تعود التلى والطرحة

وترجع تانى وحدتنا

قلوب صافية ومسامحة

ياصاحبى الدم فى الشارع

ودمعى ع الخدود سارح

وكل يوم بيان طالع

سقونا المر والمالح

تعالى وطنا محتاجلك

بصوت الشعب بندهلك

ومهما الوضع كان قاسى

دم الشهدا يشهد لك

ياصاحبى كلى اوجاع

خايفه لاجى وانباع

ماباعو كل شىء فيها

وحتى الامن اهو ضاع

تعالى ياضحكة ما تخافى تراب الارض ليك وافى

دا كله والله شوق ليك ماهو انت دوانا الشافى