لسة فاتحة دراعيني ، بقلم / وائل عبدالمنعم

مش هتقدر تنزع

حلمي وليدي

من صدري

ولا تقدر تمنع

نيلي في وريدي

دم بيجري

أنا مصر رغم الأسي

وخيري اللي اتنسي

لسة مفتوحة دراعيني

للي اتتربي ف حضني

ولما شد عوده نسي

لسة مفتوحة دراعيني

للي خلف وعوده

وللي صدق وعده ووفي

أنا مصر

مقدرش عدو ف يوم

علي كسري وقهري

فمتكسرنيش انتا

يللي من صلبي وضهري

يللي لحمك من طيني

ودمك من نهري

يللي قلت ف يوم هتفديني

ازاي ترضي بذلي ونحري

أنا مصر

أم اللي واقف حارس

ع المعابد

ع الكنايس

ع الجوامع

أم اللي زارع

واللي حاصد

واللي مالي

بخيري الصوامع

اللي واقف صاحي

علي حدودي

اللي داوي جراحي

وماسح دمعتي

من علي خدودي

أم اللي بعرقه رواني

و بدمه

اللي فتح صدره

للموت عشاني

ولا همه

أنا مصر

يللي جاي

تقيدني بقيودك الحديد

يللي جاي تخطف

ابني من حضني

وليد

قوللي ازاي

تقدر تاخدتي

من بين ايدين

تسعين مليون شهيد