هتقومى بقلم : محمد عبد الرازق

هتقومى

هتقومى غصبٍ عن إيدين الظلم

هتقومى غصبٍ عن قيود الخوف

هتقومى و تطيرى بجناحات الحلم

هتقومى مشتاقة للغنا و الشوف

بعد الضلام و العجز فى دروب العمى

هتجيبى ضيك يكسر الغيم فى السما

و تحررى الحلم اللى واقف بالسنين مكتوف

إنتى اللى صابرة ع الشقا و متحملة

خليكى دايماً للبراح متأملة

و غطى يأسك بالأمل و اتبسمى

أصل الحياة بيكى و بينا مكملة

هتقومى غصبٍ عن ليالى البرد

هتقومى غصبٍ عن وعود الزيف

هتقومى تسقى كل غرسة ورد

هتقومى نسماية فى عز الصيف

و ضلة لكل أحبابك تضميهم

و حضن لكل عاشقينك تلميهم

و غنوة حب ساكنة ف قلب كل رصيف

إنتى اللى صابرة ع الشقا و متحملة

خليكى دايماً للبراح متأملة

و غطى يأسك بالأمل و اتبسمى

أصل الحياة بيكى و بينا مكملة

العبد الفقير لله

محمد عبد الرازق