وثالثنا البحر .... بقلم الشاعر / عزيز موسى

 

بقلم / عزيز موسى

 

معقول البحر

يضحك من جديد

والموج يعيد

للناس حكايه قصتى

وافرد شراعى

فى الريح العنيد

وابعد بعيد

عن كل خوفى ووحدتى

والمح عنيكى بتترسم

وسط السحاب

نجمايه تحضن سكتى

تتمد ايدك

تغزل الفرح اللى جاى

ويا ابتسامتك

تعلا وتعلا ضحكتى

ع الرمل تكتب خطوتك

سكه لملامح خطوتى

ودى موجه تايهه

بين صوابعك

تعزف لقلبك غنوتى

بتسمّعك لحن الرجوع

لحن الحنين

تفتح فى حضنك دنيتى

يسكــنّــى همسك

صوت سكاتك

واسمعك

وأســمّــعك

أسى قلبى ولوعه شكوتى

ترتاح همومى بين ايديكى

وأفرد شراعى

ف حضنك الدافى

وتخلص رحلتى