هوووس .. بقلم أ/ محمود وحيد

بقلم / محمود محمد وحيد

 

هووووووووووووووووووووووس
ممنوع تحس
...

ممنوع تقول للظلم بس
ممنوع تطالب بالنهار
اصل النهار شمس
والشمس نور
تكشف حقيقة اى زور
لو حتى كان الزور دا همس
هووووووووووووووووووووس
ممنوع تبص
ممنوع تحارب اى لص
ممنوع تدور ع الحقيقة
اصل الحقيقة سيف
والسيف غشيم
يكره يسامح فى اللئيم
اللى ما راعى الله وحس
هووووووووووووووووووووس
ممنوع تثور
ممنوع تغير فى الامور
ممنوع تحس إنك كيان
اصل الكيان وجود
والوجود حق
بيعادى لغة الرق
والرقة ليا
وليك بخس
هوووووووووووووووووووووس
هوس وخلاص
اخرك مداس
اوعاك تفكر
فى الحياه
ممنوع تقول للغدر اه
الاه جنوح
تهدم صـــــــــــــــروح
وانت يا شعب ممنوع تحس
هووووووووووووووووووووووس