يمامة بيضا ... بقلم الشاعر / علي فرج

 

 

بقلم / علي فرج

 

يمامة بنية جميلة ..
عايشة ف وناسة مع اليمام .
حسّت بدَقة ف قلبها .. بتقولّها ..
...

هو انتي جربتي الغرام ؟
دارت ف راسها حاجات كتير ..
 قالت تطير ويّا اليمام .
طار اليمام وفضل يطير ..
لما بقى وسط الغمام ..
وفضل يلف ودار كتير ..
واما تعب قاله سلام ..
قام الغمام من فرحته ..
اخده ف حضنه برقّتّه ..
وهمس ف ودنه وقال كلام .
بان ع اليمام أثر الكلام ..
دخل اليمام قلب الغمام ..
و ف عز برده بقى دفا !!
ودابوا ل اتنين ف الغرام ..
من كتر شدة حبهم .. لقوا نفسهم .. فوق السحاب !!
قال السحاب .. ليه الغياب ..
لما انت مرسول الغرام ؟
طول عمري مفتون باليمام ..
والعشق زاد لما بقى ف قلب الغمام ..
من عشقهم دفّوا السحاب ..
وعشان ميعرفش الدفا ..
داب السحاب ،،،،
نزل المطر .. غسل البشر ..
ونشر على الارض السلام ..