قرار ايجابي ... بقلم الشاعرة / وفاء أحمد

 

بقلم / وفاء أحمد

 

دلوقتى غزة تحت النار
و ناس بتقول حرب
و ناس بتقول لا
...

ده مجرد ضرب
و ناس بتقول فين الثوار
احنا لازم ناخد بالتار
فين حق الجيرة
و حق الجار
و كلامهم فيه اصرار
و مصر لازم تتدخل
و للمعبر على طول تفتح
و للمجاهدين ترسل
مش هى قلب الامة العربيه
و لازم تساعد اهلها
انهم يحصلوا ع الحرية
و اللى بينادى راح فين
صلاح الدين
اقوله ضاع لما ضيعتوا الدين
و لما مبقيناش شاطرين
غير اننا نشجب و ندين
و على غيرنا دايما لايمين
و شايفين بعيونا و ساكتين
و نقول طالما بعيد عنا
خلينا بقى فى حالنا
و كل واحد اهتم بنفسه
و اهم شىء عنده
اكله و لبسه
طيب سؤال للى بيقول
فين مصر و دورها
اشمعنى مصر بالذات؟
ما غيرها شايف
و لازم السكات
مع انها كتيره جدا
عنده الامكانيات
لو عاوز مصر تحارب
انا مش معترضه
بس لو كل الدول التانيه
حاربت برضه
و كلهم مع بعض
يكون لهم موقف
و بلهجة شديدة يقولوا للعدو
يتوقف
و مرة فى عمرى اشوفهم يتحدوا
و لاى قرار ايجابى ياخدوا