سر الجمـال ..

سر الجمـال ..

بقلم : بهاء الدين بدوي
---------------------------

مين اللي قال ..
إن الجمال في العين

ولاّ في شامة حسن
محفورة ع الخدين
ولاّ في رموش طوال
وغرة ع الحاجبين

فيه ناس تقول السمر
فيهم جمال أكتر
وناس تقول في الشقر
عن الجمال دور
وناس في حيرة ياعيني
ولسة بتدور ..

انا عشت عمري سنين
تايه مع التايهين
وكل يوم يمضي ..
الثانية فيه بسنتين
وشفت فيه حلوين
من كل شكل ولون

ياللي انت غاوي الجمال
تعالى واتعلم ..

سر الجمال في لسان
بالحكمة يتكلم
سر الجمال في إيدين
بالحب بتسلم
سر الجمال إنسان ..
طيب ومتبســم
له قلب صافي حنون ..
راضي مايتأزم

وان جار عليه الزمان ..
صابر مايتألــــم
ومشاعره صادقة وذوق
فهمان ومتعلم
سر الجمال في عطاء
من غير ماتتكلــــم ..
ربك جميل وجماله
ع الخلق متقسم
ياللي انت غاوي الجمال
تعالى واتعلم ..

-------------------