وجع الياسمين

وجع الياسمين

بقلم : وليد مليجى

------------------------
ليلة ما كنا ف البلد
النور قطع
كله اتفزع
الكلمة طارت ف الهوا
من غير حروف
من غير معانى تلمها
من همها 
المية تبكى للشادوف
الزرع يدبل م الوجع
طلعت تعابين السباخ
و اتغيرت كل العيون
ميت لون و لون
اتعكر الوش البشوش
اتغيرت كل الوشوش
كل العقول
ورقة و لونها بيختلف
كيميا و خدناها زمان
و احنا كده........
عالم ورق
من غير ايمان
شمر دراعاتو الولد
فوق الحصان
اللى بيرمح ف الخلا
الناس تخاف من طلته
مع انه كان نفس الولد
حتى الحصان هو الحصان
لكنه من غير اللجام
حتى الولد
محتاج لجام
من قبل ما يفكر...... يقول
من قبل ما بيعيد ..... يزيد
اصل الولد
محتاج رصيد
و بهية ع الترعة 
بتغسل ف الصحون
ع الجسر عدى بالحصان
يلسع بكفه ضهرها
من قهرها 
ترمى العجين
فى بطنها
مات الجنين
اصل السجين
م السجن طار 
فيه اللى قاعد وسطنا
فيه اللى طالع ع المطار
قاعد يغنى منجلى
اصل الولد
صوته على
شاف الولاد
فرسان صغار 
ليهم شنب
يادى العجب
تيجى على اهون سبب
الدنيا صارت ملكهم
و الامر فيها مستباح
البنت تظهر ........
بعد لحظة تختفى
مش هو دا اللى حلمت بيه
فينك يا فارس 
ياللى ايدك من دهب 
مش كنت واعدنى بفرس
تخطفنى من وسط الحرس
و تجيب لى حقى اللى اتنهب
و الفارس الشهم النبيل
يطلع كمان سارق حصان
سارق بلاد
ميا و زاد
ارفع ايديك
من ع الزناد
اصلو خطر
انت ف طريق كلو بشر
رجع حصانك و ابتدى 
خيط ف توبك و انتظر
وسط العيدان العطشانين
يمكن ف يوم ينزل مطر
يمكن ف يوم ..... ينزل مطر