حلم عادي
حلم عادي
بقلم : إيهاب البعبولى
--------------------
فوق جبين الشمس باكتب
قصتي وكل الحكاية
فوق جبين الشمس باكتب
وصورة الثوار معايا
ولسكون ليلي باهمس
وباغزل الأحلام عباية
ولصخور البحر بالمس
واحضن الطير وسمايا....
(2)
فوق جبين الشمس بارسم
صورة الوطن الجميل
الزهور لما تفتح
والغصون لما تميل
والسفن الي تعدي
جوة نهر اسمه نيل
فوق جبين الشمس بارسم
صورة المصري الأصيل
العامل إل بينتج
في يوم صعب و طويل
والفلاح إل بيزرع
في يوم باهي وجميل
والحارس يحرس مكاني
وسط ناره ووسط ليل
أيوة بارسم وسط حلمي
دايرة مليانة مزارع
ودايرة تانية للمساكن
ودايرة تالتة للمصانع
ودايرة رابعة للجنود
تحضن فى إيديها مدافع
ودايرة خامسة للوطن
ودايرة ساتة للكنايس
ودايرة سابعة للجوامع
.........................
(3)
أيوة باحلم بالوطن
بالفقير وسط الصفوف
والهتاف يملا الحناجر
وصوته يهزم كل خوف
...........................
أيوة باحلم بالوطن
تتخلق ليه الحروف
أيوة باحلم بالوطن
ينكسر قدامه خوف
....................
أيوة باحلم بالوطن
عمي سعد وخالي عوف
وستي زينب والحسين
واختي عزة واختى نوف
أيوة باحلم بالوطن
صوت بهانة وفجر ونادى
طلعة بدري بنشاطها
وع البنات قايمة تنادي
قوموا شمس القطن بانت
قوموا نقطف خير بلادي
أيوة باحلم بالوطن
أيوة باحلم حلم عادي
يرجع الطير المهاجر
وعوضين يحضن هنادي
وصعيدنا يموت في بحري
ويجري يفردله الأيادي
يا أبو خاله يا أصيل
سينا رافعة الصوت تنادي
في كل ميلة للنخيل
في كل ربوة في البوادي
تصرخ الأرض تميل
أنا عايزة ابن وادي
أنا عايزة ابن نيل
أنا عايزة خير ولادي
أيوة باحلم حلم عادي
الشاعر/ إيهاب عبدالله البعبولي
ليست هناك تعليقات