الشعر لحن الحياة
الشعر لحن الحياة
بقلم / محمد مصطفى صالح رزق
.........................................
الشعر لحن الحياة
وصوتها رجعه وصداه
بين الشطور والقصايد
حروف بتعزف حياه
لحنه يطيب جروحنا
والنوته طوق النجاه
من غيرها توها وضياع
نعيش ف غربه ووداع
والعزف فطره وعطيه
وهبها لينا الاله
صوتها بيروى العطاشى
و كوثره منتهاه
لو يوم هتعطش صبابا
سطورنا تبقى المياه
بالشعر نبنى الحضارة
تعلى النفوس والجباة
بنيانه شامخ بيبهر
م المعجبين مين اتاه
بيحن ليه كل عاشق
ومين بسهمه رماه
عنتر وعبلة وليلى
وقيس وغيرهم بناه
واما تفكر صعوده
توصل لاعلى علاه
وتقول خلاص جبت اخره
تلاقيك فأول خطاه
حاسب عليك من جماله
ياخدك لاخر مداه
واللحن لما تراجعه
تلاقى فيه م الصلاة
تسبيح وذكر الملايكة
و جهاد و فكر الدعاه
فيه الدليل للحيارى
يهدى قلوب العصاة
تاريخ وعلم ومنارة
يرد للشيب صباه
يخضر الرمل الاصفر
لو المطر غاب جفاه
يواسى عاشق فليله
لو الحبيب يوم رماه
يزلزل الارض يزئر
فوجه كل العتاه
ميدانه تحرير منور
يثور ويعلى نداه
الله اكبر يا بلدى
م الظالمين والطغاه
الله اكبر يا بلدى
م الظالمين والطغاه
الله اكبر يا بلدى
م الظالمين والطغاه
تسقط عروشهم يزولوا
يوصل طريقنا لمناه
والشعر يصدح بصوته
ونغنى لحن الحياه
والشعر يصدح بصوته
ونغنى لحن الحياه
والشعر يصدح بصوته
ونغنى لحن الحياه
............................
ليست هناك تعليقات