مصر فـ خطر ، بقلم / هشام عوض

وسط السما

وسط الغيوم

عدت سحابه مشرقه

رايحه لطريق

وعليه تحوم

بصت وشافت محرقه

النار بتحرق كل يوم

والناس كتير متفرقه

ووشوش فـ خوف

ووشوش هموم

ووشوش ماهيه مصدقه

أصل الحريق

كان فـ الطريق

يحرق غيطان

راجل بريء

زراعلنا

وسط الهموم

حلموا العتيق

واقفلهم

وحده وجريء

ويقولهم

نفسي فـ شيء

نفسي نكون

واقفين فريق

ازاي بلدنا تكون فـ ضيق

ونزيد عليه

ازاي دي مصر ازاي نطيق

وجرالنا ايه

لكن مفيش بينهم صديق

مادد ايديه

عارف ياريس كله ليه

علشان خلاص مبقاش يليق

إنك تجيه

وتقول كتاب ربك طريــــــق

إرجع إليه

واللي هيسرق او يسيء

ناخد عينيه

حتى ولو بينهم شفيق

هنحاكمه بيه

علشان دا قال

فين رزقنا

خيرك يامصر

وحقنا

من بين جيوب

سارقاه أكيد

لازم فـ يوم يرجعلنا

ولا عشان

بيقول نخاف

من ربنا

واللي سرقتم

خير بلدنا وارضنا

وكفايه سرقه

فـ قوت ولادنا

ودمنا

ولا عشان

قلبه الكبير

بيحبنا

ويقول حرام

والله حرام

مش ذنبنا

اللي سرقتم

حقنا

فاكرين يدوم

دا حرام ولادكم

تلقي قوتها

فـ كل يوم

وتحطوا لينا

الفقر راكب

فوق هموم

وكمان ياويل

اللى يفكر

يوم يلوم

ربك دا شاهد

فوقنا باللي بتعملوه

وكمان هيحمى

غيطان بريء

مش هتطلوه

والرزق راح

يرجع لجيبنا

وتدفعوه

والناس وبان

ليهم خداع

منكم لقوه

وهيطلبوه

بكت السحابه من البشر

ساحت مطر

راح الحريق زال الخطر

ومفيش ضرر

اصل اللي خالق دول ودول

ستار ستر

دا اللي هيزرع خير فـ يوم

وعليه صبر

بكره هيحصد منه خير

والليل قمر

بكره تشوفوه