ستى ماتت كلمات / رضا ابو الغيط
لسه فاكر ستى لما
كنا نقعد جنب منها
ف بيتها لمه
تحكى لينا عن ما ضينا
واللى بينا
لما كنا... نستحمى
كنا لسه عيال صغار
شمع قايد وسط دار
شمس طارحه للنهار
كنا جزء من الغلابه
بس كات نادره الديابه
م الطيابه
كنت اقول لسيدى يابا
وكنت أقول لستى يا مه
كات تشيلنى فوق كتافها
رايحه جايه عامله زفه
أصلى حيله وابن عيله
وأمى كات بتدفى لفه
لما بضحك
كنت بسمع ستى تضحك
ولما يوم اعمل مكشر
كات تجيبلى كيس مفشر
وتدادينى وتلاغينى
وبغناها تقولى اصالحك
ستى لما بتبقى جنبى
كنت اشوف الدنيا بمبى
كات تطلع سيلتها
وكات تجيب لى المستخبى
ولما كان العصر يدن
كنت اطلب عيش ملدن
تدهنه جبنه بإيدها
سيتى تجرى ع المشنه
ومن حصيره معلقاها بين عينيها
ألقى سيتى عمله ليا ساندوتش
اخدوا واجرى حافى من غير الكوتش
اصلى عيل
بس كات دايما تقولى
تيجى بدرى
قبل ما الدنيا تليل
ولما شمس الكون تروح
وتبقى جايه المغربيه
كنت اشوف ستى تلوح
وف ايديها شايله ليا الجلابيه
كات تخدنى ف حضن ليها
واستخبى
تحت حِمل
فوق شواشى أحلى قُبه
واختى قاعده جنب منها
ف ايديها شايه جبه
وتدادينى وتداديها
كات بتحرسنا عينيها
ستى ماتت
ستى ماتت مش لاقيها
بس دايما ليل نهار
أنا با ادعى ليها
وف عينيا صوره ليها ومداريها
ولو ف يوم الدنيا ضاقت
با اجرى دايما واستخبى بين عينيها
رضا أبو الغيط
ليست هناك تعليقات