بحبك يابلدي ... بقلم الشاعرة / وفاء أحمد

بقلم / وفاء أحمد

 

بحبك و دايب فيكى
بس مش عارف اعمل ايه
علشان ارضيكى
...

عشق و عشقتك
دم و ضحيت
و رويت بيه ارضك
صبر و صبرت
و راضى بالهم
طالما حالى كده عاجبك
العمر كله بكيت
لاجل اشوف ضحكك
و ما اشوفش منك غير التكشيرة
و لما تيجى تضحكى
تدورى عنى وشك
و تسيبى روحى كده اسيرة
كأن انا مش ابنك
و غيرى اولى بفرحك
و دفا حضنك
شعر و كتبت
عن قلبى اللى بيحلم بقربك
و ان يجى عليه يوم
ينول الرضا منك
موال و غنيت
و عايش و عمرى ما شكيت
و برضه قاسى عليا قلبك
مع ان لونى
لون طميك
و دمى من نيلك
و ملامحى فى شوارعك
و كل ميادينك
ليه بقى مستكترة عليا
اعيش انا فى خيرك
و مفيش غيرى وقت شدتك
بيجى يقف جارك
و مستعد يضحى بروحه
و تعيشى طول العمر
و قدام الكل
رافعه انتى راسك
يبقى ليه بقى
لما اجى احس بلحظه هنا
تجبيلى الحزن بايديكى
عاوزانى اموت قدامك
و انتى كمان اللى تدوسينى
باقدامك
و كل ما اجى اتكلم
تقوليلى هس
مش عاوزة اسمع صوت
لازم تعيش فى سكوت
عاوزانى اكون عبدك
طيب انا راضى بحكمك
و طالب انك تدينى
و لو جزء بسيط من عطفك
صدقينى مش هاين عليا
حتى انى اعاتبك
و لو مرة فكرت احكيلك
تقولى انى بازود همك
يا ترى العيب فى مين فينا
انا اللى شاريكى و بحبك
و صابر على وجعك
و عنادك و دلعك
و لا انت
يلى غاويه تتعبى قلبى
مع انه بس بيتمنى
يحس بحبك

و فى امان يعيش جنبك